السبت، 23 مايو، 2015

التسهيلات البنكية (ا/رفيق هاشم )


التسهيلات البنكية
التسهيلات البنكية .. يعنى ايه تسهيلات بنكية ؟؟؟ تعالى نشوف واحده واحده الكلام ده ..
بيقولك يا برنس التسهيل ده يعنى لما تسهل على شخص ما ,, عملية ما .. ماشى ؟؟
طب وايه البنكيه ؟؟ يعنى البنك طرف فيها ...
يعنى يا استاذ نقدر نقول ان التسهيلات البنكية دى ان البنك بيسهل لنا عمليات تجاريه او نقديه بشكل ما ؟
اه طبعا .. البنك بيدخل معايا ( انا العميل ) فى عمليه ما بانه بيوفرلى الاموال الازمه لاتمام العمليه .
نقدر نقول كمان ان التسهيلات البنكية دى ليها ظوابط شويه .. بمعنى ... انى بعمل عقد مع البنك وبناء على العقد ده بيكون اتفاق بينى وبين البنك انه بيوفرلى مبلغ من المال خلال السنه اقدر استفيد منه بشكل مباشر او غير مباشر ... لا استنا يا استاذ والنبى بدات اتوه منك .. يعنى ايه مباشر او غير مباشر .
اقولك : مباشر يعنى نقد .. اخد من البنك فلوس سائله كاش ..او انه هو يجيبهالى ويحاسبى بعديييييين ..
اما غير مباشره : يعنى مش باخد فلوس فى ايدى ..  يعنى زى خطاب الضمان او الاعتماد المستندى مثلا .. انا مخدتش فلوس بس البنك ضمنى بفلوس ..
اتقل معايا شويه وانت تفهم وتستكنيص وترستأ دماغك مليون فى الميه ... تعالى نكمل J
طيب يا ريس البنك بيضمن الفلوس بتاعته ازاى ؟؟؟؟؟ قالك يا حاج البنك مش عبيط علشان يرمى فلوس كده فى الشارع من غير ما يكون عارف ايه المردود من وراها .. بمعنى ...
ياخذ البنك عده ضمانات على العميل وبيكون اولها سمعه العميل لدى البنك ( العلاقات الشخصيه ) و ضمان العمليه الجاريه نفسها .. يعنى لما البنك بيمول شراء بضاعه بيكون العميل متنازل على البضاعه دى مستنديا للبنك لحد ما يسدد الفلوس ..
ومثلا فى خطابات الضمان بيكون العميل متنازل للبنك على المستخلصات ... بمعنى انها بتدخل البنك وبعدها البنك بيصرفها لى او بتنزل فى حسابى ...
او فى حاله الاراضى او العقارات العملي بيرهن العقار ده عند البنك لحد ما يسدد تمنه وبعدين يفك الرهن
خلى بالك الكلام ده مختلف من عقد تسهيلات الى عقد داخل البنك الواحد .. او انه بيختلف كمان حسب البنك .. يعنى انا مثلا كان عندنا عده عقود تسهيلات مع عده بنوك وكل واحد فيهم بيه شروط واحكام مختلفه . بس الاكيد ان كله بياخد منك فوائد وضمانات ..
من اشكال الضمان لعقد التسهيلات مثلا – الرهن العقارى – اى انك بترهن لدى البنك هقار او اراضى او اسهم وسندات كمان . ومتقدرش تبيعها او تتصرف فيها طوال فتره العقد ده ...
طيب ايه كمان ؟؟ قالك ان فى حاجه اسمها سحب على المكشوف .. يعنى لو انا مدى شيك لحد ومعنديش رصيد فى البنك .. بيتصرف الشيك عادى وبعدين البنك بيرجع على .. مع وجود فوائد طبعا ...
ايه رايك ناخد مثال كبيررررر شويه بقيود ونشوف القصه دى كلها على بعضها ...
مثال شامل للتسهيلات البنكيه .
عقدت شركة الهاشم عقد تسهيلات بنكيه مع بنك مصر فى 1/1/2014 م
اولا شروط واحكام عامه : .... هنا بقا شويه كلام كتير كده ...
ثانيا حدود التسهيلات :
يوفر بنك مصر لشركة الهاشم تسهيلات بمبلغ 110 مليون جنيه مصرى تبداء فى 1/1 وتنتهى فى 31/12/2014 م ... تشمل الاتى .
1.   خطابات ضمان ابتدائى .
قيمه 10 مليون جنيه – غطاء نقدى 10% - عموله اصدار 5.% بحد ادنى 500 جنيه – فوائد تغطيه 25.% - مدة التغطية 6 شهور . قابل للتجديد .
2.    خطاب ضمان نهائى .
قيمه 25 مليون جنيه – غطاء نقدى 15% - عموله اصدار 5.% بحد ادنى 2000 جنيه – فوائد تغطي1.5% - مدة التغطية 12 شهر . قابل للتجديد
3.   خطابات ضمان دفعه مقدمه .
قيمه 35 مليون جنيه – غطاء نقدى 15% - عموله اصدار 5.% بحد ادنى 2000 جنيه – فوائد تغطيه 1.5% - مدة التغطية 12 شهور . قابل للتجديد .
4.   اعتماد مستندى / داخلى / خارجى / دفع عند الاطلاع – لتمويل احتياجات الشكة من مواد .
القيمة 7 مليون جنيه – مده 6 شهور – فوائد 2.5 % 
5.   جارى مدين ( سحب على المشكوف ) .
قيمة – مليون جنيه – المده 3 شهور – فوائد 5% .
6.   تمويل اصول طويلة الاجل .
قيمة 10 مليون – مدة 24 شهر – فوائد 7 % . دفعة مقدمة 10 % .
7.   نقد اجنبى .
قيمة 5 مليون جنبه – مده 9 شهور – فوائد 3% .
8.   تمويل شراء اراضى ومبانى
قيمة 10 مليون – دفعه 10 % - عموله 7.5% - مده 36 شهر .
9.   قروض طويلة الاجل .
قيمة 7 مليون – المده 24 شهر – الفائده 8 %  .,,,

** انا هحسب بطريقه فائده بسيطه للتسهيل بس البنك بيشتغل بجداول الفائده ... **
ثالثا : ضمانات عقد التسهيلات :
وافقت شركة الهاشم على الضمانات التالية .
1.    التنازل عن المستخلصات الجاريه من المشروعات المموله لصالح البنك
2.    افراغ رهن عقارى – صك رقم ....
3.    رهن ااسهم وسندات .....
4.    شويه ضمانات كده غير انها كمان فى رئيس مجلس الاداره او العضو المنتدب او المدير العام بيمضى على حاجه زى ايصالات الامانه مقابل التسهيلات دى بنفس القيمة .. كل ده ولا يشغلك
-         وافقت شركة الهاشم على خصم 1% من قيمة التسهيلات مقدما فوائد وعمولات بنكية ودراسات وحبشتكانات .. يعنى هياخد عموله 1% قبل اى حاجه ... عادى انت اللى رايحله J
.......................................................................................................

سيبك بقا من كل ده وتعالى نشوف شويه معلومات عامه كده على السريع ..

·       اول حاجه البنك هياخد منك عموله قدرها 1.1 مليون جنيه قبل اى حاجه .. ( 1% من قيمه العقد)
·       البنك اخد منك ضمانات عقاريه ورهن اسهم وايصالات امانه وحاجات كده . علشان لو انت لعبت بديلك يكون هو ضامن فلوسو ويروح يبيع الاراضى او الاسهم ويحصل فلوسو ولو اتبقى حاجه يردهالك .. وده زى اللى بنشوفو فى المزاد العلنى لبيع ارض من بنك مصر .......
·       البنك بيديلك المبالغ دى تتصرف فيها وطبعا هياخد على كل حاجه الفائده غير الفائده اللى اخدها فى الاول ( 1% ) يعنى طالع واكل نازل واكل ..
·       خطابات الضمان لو كانت على سنتين هياخد منك فائده كل سنه لوحدها وان كان ممكن ياخد منك الفائده للستنين مقدما .. او بياخد سنه   بسنه – على مرتين يعنى .. ايهما وكله شغال .
·       القطع او النقد الاجنبى ده بيديلك عمله اجنبيه ( دولار او يورو ) بسعر الصرف الرسمى بس بياخد منك عموله لانه اولا وفر لك المبلغ وتانى حاجه لانك هتردهم بعد مده ..
·       فى الحالات اللى البنك بيديلك فيها فلوس سايله ( قروض ) ولتكن مثلا مليون جنيه وهيخصم منك وليكن مثلا ميه الف ( 10% ).. هنا يا اما هيدلك المليون كاش وانت هتدفع الفائده 100 الف .. او انه بينزلك فى حسابك 900الف يعنى بعد خصم العموله مقدما .. وفى الحالتين ال 10% دى فائده وتندفع كما انك هتسدد المبلغ على اقساط بجدول كده زى اللى اخدناه ايام الجامعه زماااااان لو فاكر
·       خلى بالك فى التمويل لشراء اصول طويله الاجل ممكن البنك يجيبلك الاصل ( مرابحه ) ويبيعه لك ويقسط تمنه وطبعا بعد اضافه الفوائد والعمولات.. او انه يديلك الفلوس وانت تروح تشتريه وبرضو تقسط القيمه للبنك فى خلال المده المتفق عليها وبالفوائد المتفق عليها وكل حاجه ..
·       فى حته شراء الاراضى والعقارات دى غالبا بعد ما بتشترى الحاجه البنك بيخليك راهنها عنده يعنى مش هتقدر تبيعها لحد ما تسدد كامل قيمتها ( الاقساط )  وبعدين يفك الرهن العقارى او الارض وتقدر تتصرف فيها براحتك بعد كده .
·       فى الاعتماد المستندى ده البنك بيمولك شراء بضاعه من جوه او من بره البلد . اما اعتماد الدفع عند الاطلاع ف ده لما مورد بيجيبلك الحاجات انت بتودى الورق كله للبنك ( امر الشراء والفاتوره واستلام المخازن وكل ورقك ) والبنك بيدفع الفلوس للمورد ان بينزلها فى حسابك وانت تديها للمورد ايهما على حسب اتفاقك معاه ..
·       عمومااااااا القاعده العريضه .... التسهيلات البنكيه او المصرفيه او الائتمانيه دى كلها فكرتها واحده الا وهى ان البنك بيمولك – بيديلك فلوس – او بيضمنك بفلوس – فى مقابل انه بيكون واخد منك ضمانات لفلوسو غير انه بياخد منك فوائد نظير القصه دى .. والشركات بتلجاء للبنوك فى الحاله دى علشان توفر السيوله عندها .. يعنى لو ان اعاوز اجيب اصل ب 5 مليون او خطاب ضمان او بضاعه او ارض . من الافضل ان البنك يمول لانه بيملك فلوس كتير وبيقسطلى الكلام ده على عده اقساط ( اصل التمويل + الفائده ) او انى بدفع الفائده فى الاول وبعدين بدفع اقساط الدين .
·       عموما الفكره واحده فى كل الحالات الا وهو انى باخد تسهيلات علشان اوفر السيوله فى الاجل القريب وبدفع مقابل الفلوس دى فوائد – تكلفه الاقتراض هنا هى الفاوئد والمصاريف .
·       الفوائد دى يتم تحميلها على تكلفه المشروع ( خطابات الضمان ) او على البضاعه (اعتماد مستندى) او على الاصل ( شراء اصول ) اما فى القروض متعدده الاغراض – تمويل راس المال العامل – فيتم تحميلها م عموميه واداريه للفتره التى تم فيها الاستفاده من القرض ... بس
قبل اى كلام طبعا البنك هياخد منى عموله 1% من قيمه العقد ( مصروفات العقد )
= 110مليون جنيه × 1% = 1.1 مليون جنيه ... وهنعمل قيد كده
1.1         من ح / م عموميه واداريه – عمولات ومصاريف بنكيه – عقد تسهيلات بنك مصر ..,,,,
1.1         مليون الى ح / البنك – بنك مصر – خصم عمولات عقد تسهيلات .....
تعالى نشوف بقا باقى الحركات ...؟؟؟ هنعمل ايه ف ايه ؟؟؟ شرح مبسط وقيود فى السريع
خطابات الضمان
 




زى ما احنا عارفين ان خطاب الضمان ده عباره عن ورقه البنك بيطلعها من عنده بيضمنى لدى الجهه المالكه للمشروع ... يعنى ايه ؟؟
يعنى انا داخل مشروع - مقاوله انشائيه مثلا .. ومالك المشروع ده ميعرفنيش ف بيطلب منى خطاب ضمان ( يعنى البنك يضمنى لدى المالك ) يبقى انا عندى 3 اطراف .. انا والبنك والمالك .
البنك بيضمنى لدى المالك .. يعنى لو انا استهبلت .. المالك بياخد خطاب الضمان وبيروح البنك يسيل الخطاب .. بمعنى انه بيحوله الى فلوس بدون الرجوع الى . وبالتالى البنك بيطالبنى بالفلوس دى ..
تعالى نقول ان خطاب الضمان ده ابتدائى ونهائى ودفعه مقدمه ...
برجاء الرجوع الى كتاب محاسبة المقاولات للشرح اكتر من ناحية المقاولات ...
طيب المشروع ده مثلا مثلا ب 50 مليون .. يبقى انا المفروض انى اعمل :
خطاب الضمان الابتدائى ب 1% = 500 الف ,    وبعد ما يرسى على المشروع ....
خطاب الضمان النهائى مثلا 10% - 5 مليون ( ممكن فى حالات بيكون 5% )
خطاب ضمان الدفعه المقدمه 20% مثلا = 10 مليون . ( مش ثابتة برضو حسب عقدك مع العميل )
يعنا انا مطلوب منى 15.5 مليون جنيه خطابات ضمان .... اووووف كيتر اووووووى
علشان كده انا بلجاء لعقد التسهيل مع البنك علشان يوفر ليا الفلوس دى بدل ما يحجز منى 15.5 مليون وتضيع على فرص استثماريه كتير .. يعنى بيوفر لى سيوله كبيره انا اولى بيها .. علشان كده بياخد منى عموله ومصاريف وفوائد بس دى ولا حاجه مقابل اه يوفرلى 15 مليون جنيه .. تمام ؟؟
هنقول تانى لو عاوز تفهم القصه من ناحيه المقاولات برجاء الرجوع الى كتاب محاسبة المقاولات فى جروب محاسبين ورايقين – فيس بوك – قسم الملفات .. هتلاقيه مشرف وهتفهم منه كل حاجه ..
https://www.facebook.com/groups/288465501360934/files/
وبرجاء مشاهدة شرح محاسبه المقاولات على اليوتيوب – رفيق هاشم احمد  ..,,
هنا هناخد بس الحته اللى تخص التسهيلات الائتمانيه ...... لانى لو مش عندى عقد تسهيلات مع بنك هضظر اروح اى بنك واجمد من حسابى 15.5 مليون علشان يطلع لى خطابات وده حال الشركات الصغيره اللى معندهاش عقود تسهيل مع بنك مما يؤثر على امكانيه انها تاخد مشاريع كبيرة ...
انا بقا عندى عقد ف انا كده عاوز اعمل 3 خطابات ضمان .. هروح البنك اللى انا متعقاد معاه وهقولو اعملى يا حاج القصه دى ....  البنك هيشوف الحد اللى هو موفره ليه اد ايه ... ولو كان تمام بيصدر لى الخطابات دى ..
البيان
الحد الائتمانى
المطلوب
الغطاء
قيمة
العموله +مصريف
قيمة

خ ض ابتدائى
10 م
5.     م
10 %
50 الف
125+500
625

خ ض نهائى
25 م
5 م
15%
750 الف
5.+1.5=2%
15000

خ ض دفعه مقدمه
35 م
10 م
15%
1.5 م
5.+1.5=2%
30000


خلى بالك ان الابتدائى قالك عموله 25.% = 125 جنيه + مصاريف اصدار 500 = 625 ج
اما فى النهائى والدفعه المقدمه زودنا 5.% لانها اكتر من 2000 ج عمولة الاصدار لان البنك بياخد ايهاما اكتر ... فى الابتدائى 5.% كان هيطلع مبلغ اقل من 500 جنيه علشان كده اخد الاكتر وهو 500 جنيه
حد فاهم ؟؟ حط فى دماغك كده علطول ان البنك عاوز يشتغلك او ياخد الربح الاكتر وفى كتير من الاحيان بيستهبل ف انت لازم تبقى صاحى .. بس كده
تعالى نكمل وادينا شفنا ان عندى امكانيه ان البنك يمولنى بالمبلع ده لانى لسه فى حدود المتاح ..
بفرص مثلا مثلا ان انا عندى 5 خطابات ضمان نهائى مفتوحين بالفعل و القيمه اللى انا فتحت بيها خطابات ضمان نهائى عدت الحد المتاح عندى – 25 مليون ,, وان اعاوز اعمل خطاب ضمان جديد ..
البنك هنا مش هيرضى وهيخصم منى المبلغ كله لانى عديت الحد المتاح ..
ولكن فى كثيرا من الحالات و لما تكون علاقتى مع البنك كويسه ... بنتفاوض على انه ياخد من الحد بتاع الدفعه المقدمه مثلا او من التسهيلات الاخرى اللى مش بستعملها .. تمام
فاهم ؟؟ يعنى بحاول اخد اقصى استفاده وفى المقابل البنك بيعلى على العموله والمصاريف شويه ..
فى كل الحالات تقريبا القيد بتاع خطابات الضمان ايا كان نوعه واحد : مثلا الابتدائى
من مذكورين
50000 من  ح / غطاء خطاب الضمان الابتدائى
625 ح / عمولات ومصاريف بنكيه ولو نهائى او دفعه مقدمه يبقى نحمله على تكلفه المشروع
50625 الى ح / البنك
اما باقى القيمه بتاع خطاب الضمان ف البنك نغطينى بيها اصلا 450 الف وهى تغطيه البنك ..
يعنى انا دلوقتى بدفع 10% زى ما انا متفق مع البنك البنك بيغطى الباقى .. ودى تسهيلات غير مباشره
ليه غير مباشره ؟؟؟ لان البنك فعليا مدفعش حاجه خالص ولا طلع جنيه من عنده . ها طلع بس ورقه
خطاب ضمان .. مفهومه ؟؟ علشان كده الفوائده بتكون قليله 5. او 1 او 2 % بالكتير ..
انما لو طلع تمويل مباشر .. فلوس .. هياخد فوائد وعموله اكتر ...
لما نيجى نقفل الخطاب ده لانتهاء الغرض منه هنعكس القيد بس الفوائد بتروح على ..
50000 من ح / البنك
50000 الى ح / خطاب الضمان الابتدائى . وزيه بالظبط النهائى والدفعه المقدمة .
بفرض انى عاوز اعمل خطاب ضمان وزى ما قلنا الحد الائتمانى فى خطابات الضمان الابتدائى مثلا انتهت ... يعنى انا فاتح عده خطابات ضمان ساريه لدى البنك واستهلكت القيمه كلها اللى البنك مخصصهالى وبرغم وجود ارصده غير مستغله عند البنك فى التسهيلات ( مثلا الاعتماد المستندى ب 14 مليون وانا فاتح 4 اعتمادات ب 8 مليون بس مثلا .. وفى كده 6 مليون تسهيلات غير مستغله .. بس البنك محدد مسبقا ان الفلوس دى للاعتماد وليس للخطابات ) عرفنا ان البنك ممكن يقبل او يرفض انه يحول جزء من التسهيلات الى جزء اخر .. ولكن بفرض انه لم يقبل وانا عاوز اعمل خطاب ابتدائى ب مليون جنيه ف هنا هدفع كامل المبلغ ويخصم من حسابى بس مش هياخد منى اى فوائد وهياخد عموله بس ..
من مذكورين
1 مليون ح / غطاء خطاب ضمان ابتدائى
500 ح / م عموميه – عموله اصداء خ ض ابتدائى –( وبعدها تكلفه المشروع لو رسى علينا )
1000500 الى ح / البنك
خلاصه القول :
·       خطابات الضمان ( الابتدائى نهائى – دفعه مقدمه ) دى من ضمن التسهيلات البنكيه ..
·       فى حاجه اسمها غطاء خطاب الضمان وده النسبه اللى انا بغطيها او بدفعها من قيمه الخطاب نفسه والباقى بيقوم بتمويله البنك .. يعنى ان اهغطى 10 % من قيمه الخطاب مثلا .. شوف المثال فوق .
·       البنك بياخد منى عموله اصدار و باخد فوائد .. بس لو انا مغطى الخطاب كله البنك هياخد منى بس عمولة الاصدار .. ومش هياخد فوائد لانه لم يقوم بتمويل اى جنيه بل انا اللى غطيت – مولت – الخطاب كله .. تمام ؟؟
·       ليا حد ائتمانى فى خطابات الضمان دى وبعدها اى خطاب ضمان تانى هيطلع انا اللى هغطيه – تمويل - يعنى البنك هيخصم من رصيدى او هيجمد من رصيدى كامل المبلغ علشان يدينى خطاب ضمان – بس فى حالات تانى ممكن اخده من رصيد تانى غير مستغل زى ما شفنا .
·       قالك الفوائد فى حاله الخطاب النهائى والدفعه المقدمه بتحمل مباشره على تكلفه المشروع .. اما الابتدائى فيحمل م عموميه (اعباء تمويله)ولو المشروع رسى علينا بنحولها الى تكلفه على المشروع
·       تكلفة الاقتراض هنا هى تكلفه الحصول على التمويل .. وتحمل على المشروع او م عموميه ..,,
·       عاوز اقول حاجه مهمه جداااا تخلى بالك منها ..,, قيمه خطاب الضمان & غطاء خطاب الضمان .. يعنى ايه دول وازاى تفرق بينهم ؟؟ هنفترض ان قيمه العمليه ب 5 مليون وانا هعمل خطاب ضمان ب 10% نهائى – يبقى قيمه الخطاب = 5 ×10% = 500 الف .. واضح ؟؟؟؟؟ طيب اما غطاء الخطاب ف ده الجزء اللى انا هغطيه من الخطاب ده . بمعنى ان قيمه خطاب الضمان النهائى ده 500 الف وانا هغطى وليكن 15% منه نقدى والباقى هيمولنى او هيغطيه او هيضمنى بيه البنك .. يبقى غطاء خطاب الضمان = 500× 15% = 75 الف .. ده اللى انا هغطى بيه الخطاب والباقى من المبلغ  البنك هيغطينى بيه = 500 -75 = 425 الف ..
·       لو انت شغال على برامج جاهزه وفيها نظام خطابات ضمان هو ده اللى هتلاقيه ولو شغال حاجات متوسطه او دفترى او اكسيل برضو هو ده اللى هتلاقيه J بس البرامج الجاهزه دى بتدى معلومات اكتر واحسن ..
·       لو انت شغال على اكسيل او دفاتر وخلافه هتعمل لنفسك جدول متابعه لخطابات الضمان دى يا برنس واحنا منزلين فى جروب محاسبين وراقين جدول كامل للتسهيلات فيه حته الخطابات دى ..
·       فى ناس بقا لما بتعمل خطاب ضمان ب 500 الف بتثبته الاول و تثبت بعدها الغطاء .. ازاى ؟؟
500 من ح  / خطابات ضمان بنكيه – نهائى بنك مصر
   500 الى ح / تسهيلات بنكية – خطابات ضمان ,,,,,,
ومن ثم بيثبت غطاء الخطاب ... والعموله وكده
من مذكورين
75000 ح / غطاء خطاب الضمان – نهائى بنك مصر
2400 ح / م مشاريع ×××
77400 الى ح / البنك
انا بقا مش محتاج اعمل القيد الاول لانى عدى جدول متابعه خطابات الضمان اصلا وعارف كل حاجه عه ومش عاوز ادخل قيد وهمى علشان يدينى المعلومه دى وا اعارفها من الجدول بتاعى .
حاجه لطيفه اووووى بقا ان البنك المفروض ياخد عموله على المبلغ اللى بيغطيه بس وليس على قيمه الخطاب بالكامل .. بس فى الغالب بياخد عموله على كامل مبلغ الخطاب ..
يعنى ممكن تلاقى عقد تسهيلات والبنك بياخد عموله على كامل قيمه الائتمان و فى بنك تانى او فى نفس البنك بس عقد مع عميل تانى او انت عامل عقد تسعيلات مع بنك تانى واحد فيهم بياخد العمولات والفاوئد على كامل قيمه الخطاب – والتانى بياخد بس على القيمه اللى بيغطيها البنك ..
كفايه بقا خطاب ضمان بقا .. تعالى نشوف يعنى ايه حاجه تانى
تابعونـــــــــــــــــــــــــــــــــــRAFY_HASHــــــــــــــــــــــــــــــــــــا
الاعتماد المستندى
 





يعنى ايه يا عم بقا الكلام ده ؟؟؟ يادى النيله هوا انا لسه فهمت الاولانى ؟؟؟ لما تدخل بالتانى !!؟؟
اهدى وركز والاول تعالى اقولك برجاء مراجعه الاعتماد المستندى وطريقته وكل حاجه عنه فى كتاب المحاسبة المالية
موجود فى جروب محاسبين ورايقن واللينك اهو :
https://www.facebook.com/groups/288465501360934/files/
وياريت كمان لو تشوف تسجيل كورس المحاسبه الماليه على اليوتيوب – رفيق هاشم
تعالى نشوف بقا الاعتماد المستندى من وجهة نظر التسهيلات البنكيه .. يعنى ايه بقا ؟؟
انا شركه تجاريه او صناعيه او مهلبيه .. ومحتاج اجيب مواد خام للانتاج او بضاعه علشان ابيعها او مواد بتستعمل فى الانشات مثلا او اى حاجه .. ومفيش عندى سيوله كافيه او انى محتاج السيوله دى لحاجات تانى اعمل ايه ؟؟  اروح علطول للبنك اللى انا عامل معاه اعتماد مستندى ...
طيب ايه الحل يعنى ؟؟؟ اقولو اعطنى مما اعطاك الله J
نفتح اعتماد مستندى لتمويل احتياجات المشروع او الشركه .. يعنى هنجيب مواد او بضائع ..
زى ما احنا عارفين ان الاعتماد ده بيكون اما داخلى او خارجى زى ما قلنا ..
يعنى مورد من جوه البلد او من بره البلد ..
لو من جوه البلد دى انا بفتح اعتماد لانى هشترى بضاعه ب مليون جنيه ..
ببعت امر الشراء طبعا للمورد والمورد بيجيب البضاعه ويسلمهالى وانا بمضيله انى استملت .
اما انه بيجيب لى الفاتورة و انا بستف الورق واروح البنك واخد شيك واديه للمورد
او ان المورد بياخد امر الشراء وتسليم البضاعه والفاتورة وبيروح البنك مع الاعتماد اللى انا فاتحه قبل كده ليه وهو بياخد الفلوس ...
طيب انا هعمل ايه ؟؟  اول ما استلم البضاعه هقول
1 مليون من ح  / المخزون
1 مليون الى ح / المورد
ولما المورد ياخد الشيك منى او من البنك بفرض ان الفلوس منزلتش فى حسابى وهو اخد من البنك علطول
1 مليون من ح / المورد
1 مليون الى ح / تسهيلات بنكية - اعتماد المستندى  - اعتماد بتاع .,,,’’’,,..
ولما بسدد الفلوس للبنك – طبعا فى فوائد 2.5%= 25 الف وهدفع خلال 6 شهور .هقول
من مذكورين
1 مليون ح / اعتماد مستندى
25000 ح / م عموميه – فوائد تمويل اعتماد مستندى ....
1025000الى ح / البنك
الكلام ده ببساطه وبدون لعبكه ..... تعالى معايا بقا J
.............................................................. نقطه ومن اول السطر وركززززز ..
قالك يا برنس المفروض انى بحمل تكلفه الاقتراض دى (الفوائد) على البضاعه .... لانى حسبتها مخزون
واحد يقف ويقولى ليه يعنى ؟؟؟ المفروض دى تكون م عموميه – فوائد ....
اقولو انت صح بس خلى افقك واسع شويه وتعالى نقول مثلا انى اشتريت البضاعه دى ب مليون .. وانا جاى زبون هيشتريها دلوقتى ب 1.125,000 جنيه .. يعنى انا كسبان نظريا 125 الف .. اشطى ابيع واجيب تانى بسرعه واهو دوره راس المال تشتغل ... بس ده غلط وهطل يا استاذ .
ليه يا عم مهو انت جايبها ب مليون وهتكسب 125 الف ..
خد بالك بقا ان تكلفة البضاعه دى علي مش مليون بس .. حط عليها الاتى كمان ..... ( تكاليف ) :
قيمة البضاعه
فوائد التسهيلات
م نقل وشحن
ايجار المستودع
م عمومية
اى حركات تانى
الاجمالى
1 مليون
100,000
15,000
5,000
2,000
1,000
1,123,000

يبقى انا لو بعت الباضعه دى ب 1.25 م يبقى انا كسبان بس الفين جنيه ....
علشان كده فى فكرة البضاعه او المخزون دى لازم نحمل البضاعه بكل التكلفه علشان اشوف انا اقدر ابيعها بكام .. ولو انا هحط نسبه ربح 20% من قيمه البضاعه يعنى 200 الف يبقى انا المفروض ابيعها ب اكتر من 1,323 الف .. وصلت ...
قالك برضو انى لو مشترى المواد دى علشان ادخلها فى الانتاج يبقى لازم تكلفه الحصول عليها تدخل من ضمن تكلفة الانتاج ..... ولو شاريها لمشروع انشائى ( حديد واسمنت ) تدخل من ضمن تكلفه المشروع .
قالك فى حاله الاعتماد المستندى للبضاعه من الخارج ( مورد خارجى ) كل تكلفه البضاعه بقا بتحمل عليها لحد ما تدخل مخزون ... يعنى كل ما ادفع فلوس بحملها على البضاعه من شحن وجمارك ومصاريف وخلافه ..
يعنى لو انا فاتح اعتماد ب مليون جنيه وكان فى شحن وجمارك وتخلص وفوائد بقيمه 200 الف كل ده هيتحمل لى البضاعه اللى جاتلى .. وتبقى تكلفتها على 1.2 مليون .
طيب نقطه نظام .. فى عندنا معيار اسمه تكلفه الاقتراض بيعالج الحكايه دى ..
قالك الاصل المؤهل لتحمل التكلفه نحمل عليه المصاريف البنكيه والفوائد ...
التمويل ( القرض ) اللى بتاخده لتمويل احتياجات مشروع او امر انتاجى بعينه .. تحمل عليها تكلفته .
بمعنى ايه بقا علشان انا لفت دماغى اوى الكلام الكبير ده ؟؟؟
يعنى انا فاتح اعتماد علشان اجيب حديد ( سواء مورد داخلى او خارجى ) للمشروع الانشائى ده بعينه وهستعمله فيه يبقى احمله على تكاليف المشروع ويبقى الحديد اللى دخل المشروع ب 1.2 مليون .
ويبقى القيد بتاعى بفرض انى مورد داخلى وتحملت بس فوائد ...
 تعالى نقول انى اخدت الفلوس كاش وانا اللى هجيب وطبعا فى فوائد (الاعتماد مليون والفوائد 100 الف )
من مذكورين
 مليون ح / البنك
100 ح / م عموميه - فوائد بنكية بتاع الاعتماد ( حملتها مؤقتا لحد ما اجيب البضاعه واقفلها فى م المشروع )
1.1 مليون الى ح / اعتماد مستندى
خلى بالك .. ممكن يديلك الفلوس ناقصه 100 الف يعنى يديلك 900 الف – يعنى خصم الفائده مسبقا
طيب انا بقا اشتريت المواد دى ب مليون جنيه  وبفرض انى دخلتها على المشروع مباشره
1 مليون من ح / تكاليف المشروع – حديد مثلا
 1 مليون  الى ح / البنك
كده انا دخلت المواد .. بس ناقص عندى ايه الفوائد .. احملها على ام المشروع واخصمها من م عموميه
100 من ح / تكاليف المشروع – فوائد ,,,,
100 الى ح / م عمومية – فوائد اقتراض
ليه انا عملت اللفه دى .. لانى ممكن لما اخد الفلوس دى مجبش بيها مواد للمشروع وبذلك متبقاش تكلفه عليه وتفضل م عمومية زى ما هى ... J اشطى ؟؟؟ طيب تعالى ورايا J
طيب لو انا هستعمل المواد دى على سنتين ... يبقى الحل بسيط .... جزء الفائده ده مصروف والجزء التانى بتاع السنه الجايه يبقى مصروف مقدم ... ارجع لكتاب المحاسبه الماليه برضو ..
من مذكورين 
مليون ح / اعتماد مستندى
12500 ح / تكاليف المشروع – فوائد ,,,’’’
12500 ح / مصروف مقدم – فائده الاعتماد لسنه الجايه
1025000الى ح / البنك
..................................................... تعالى نكمل كده ونشوف هنقول ايه ؟؟
بفرض بقا ان البنك بيديلك الفلوس ناقصه العموله ..
يعنى الاعتماد ب مليون والعموله 100 الف . هو ادالك فى البنك 900 الف حته واحده ... الحل ببساطه
من مذكورين
900 ح / البنك ( نزل فى حسابى المبلغ ده
100 ح / م عموميه – فوائد تسهيلات – اعتماد ...,,،××
    1 مليون  الى ح / تسهيلات بنكيه – اعتماد مستندى ,,,..//×÷
بس كده J
لو الاعتماد ده انا جايبه من بره البلد .. من الصين .. والبنك بيدفع الكلام ده كله ..
برجاء مراجعه كتاب المحاسبه الماليه علشان تفهم الكلام ده وهو مشروح ببساطه وبالتفصيل ...
نخلى بالنا برضو انى لما بشترى البضاعه دى بتكون عليها ضريبه مبيعات وحاجات كده بس ده مالوش دعوه لانى لما ببيعها باخد ضريبه مبيعات والمفروض انى اورد الفرق لمصلحه الظرايب J
الخلاصه ...
·       الاعتماد المستندى ده انا بفتحه علشان ايه ؟؟؟ تمويل الاحتياجات من بضاعه سواء هبيعها ك بضاعه زى ما هى ( ملابس مثلا او اجهزه كهربائيه )  او هصنعها ( قماش هصنعه ملابس ) او هتدخل فى تكاليف عمليه انشائيه ( حديد واسمنت )  .
·       فى كل الحالات سواء مورد داخلى او خارجى مش هتفرق كده كده البنك هيدفع للمورد او لبنك المورد الخارجى وبعيدن هيحاسبنى .. مع اختلاف الاجراءات والمده ..
·       اللى هيفرق معاك لو مورد داخلى هيدفع بالجنيه ولو بره هيبقى بالدولار وانت اصلا مالكش دعوه لانك هتدفع بالجنيه .. بس الخارجى هو هياخد منك مصاريف وعمولات وفوائد اكتر شويه .
·       انت بتقدم المستندات الخاصه بالشراء من امر شراء واستلام وفاتورة ( وفى حاله المورد الخارجى يبكون فى شحن وجمارك وحاجات كده ) والبنك بيدفع عنك الفلوس وبعدين بيحاسبك ...
·       خلى بالك ان المحاسب مش بيعمل الكلام ده وبيكون فى حد مختص وخصوصا فى حاله الجمارك وانت بس بيجيلك الكلام ده جااااااهز .. وملكش دعوه بيه لانك هتتمرمط لو شغلت دماغك بيه .
·       روح بقا المينا وخلص واشحن وبلابلابلا .. انت باشااااا وملكش فيه J
·       فى كل الحالات تقريبا انت هتحمل الفوائد على المشروع الانشائى او تكاليف الانتاج او المخزون لو هتخزن الحاجه دى .. بس لو مخزون هتقيمه بعد كده فى اخر السنه ب التكلفه او صافى القيمه العادلة ايهما اقل .. بس لما تجيب البضاعه هتحمل عليها الفوائد عادى ...
·        المهم يا برنس افهم الفكره من الاعتماد المستندى : هو صورة من صور التمويل غير المباشر ,,
·       الاعتماد المستندى البنك بيدفع فيه نقد للمورد ومن ثم بيجى عليك باصل المبلغ والمصاريف والفوائد وانت بتدفعها بدورك ...
·       الاعتماد المستندى ليه تكلفه ( تكلف الحصول على الاموال ) وهى الفوائد عادى جداااااا ..,,,
·       الاعتماد المستندى ده بيوفر لك سيوله انك تجيب البضاعه وتبيعها وبعدين بتاخد ربحك وتدى للبنك فلوسو وبيكون من شهر الى 12 شهر ..او على حسب عقد الاتفاق وعلى حسب البنك نفسه .
·       فى حاله المورد الخارجى يعنى بضاعه من بره بيكون عندك حاجه اسمها معامل الدولار وده علشان تعرفه فى مثال سهل للاعتماد المستندى فى كتاب المحاسبة الماليه يا ريت تشوفه وتفهم منه بس خلى باااااااااااالك انه فى المحاسبة الماليه انا شارحها من وجهة النظر المحاسبية .. يعنى انت مختلفه عن الى هنا شويه ومفترض انك بتدفع الفلوس دى بنفسك .....
·       تانى فى المحاسبة الماليه المثال اللى فيه بيفترض انك فاتح اعتماد بس هتموله مش من ضمن عقد تسهيلات بنكية ...
·       نفسى بقا تعمل لنفسك مثال كده وتحله و تقولى ايه اللى عملته ..
·       ياريت تحضر معانا او تنزل تسجيل كورس التسهيلات الائتمانيه من على اليو تيوب : رفيق هاشم
كفاية كلام كده فى الاعتماد المستندى
وتعالى نشوف حاجه تانى J


تـــــــ جروب ـــــــــــــابعونـــــــــ محاسبين ورايقين ـــــــــــــــــــــــــــــــا

تمويل شراء الاصول طويلة الاجل
 





تعالى نقول كده تمويل دى يعنى البنك بيمولنى.. بس ليه ؟؟؟  علشان اشترى اصول ثابتة ..
عربيه – الات ومعدات – ماكينات انتاج – اى بطيخ ...... بخلاف الاراضى والمبانى ( ليها بند لوحدها )
طيب يعنى البنك بيدينى فلوس وانا اشترى ولا هو بيشتريلى العربيه او المعده او الماكينة !!! ؟؟؟
مش هتفرق معاك حاجه الاتنين واحد تقريبا مع اختلاف بسيط فى القيود والاجراءات .. انما المبداء واحد
يعنى ايه الكلام ده ؟؟
المبداء واحد يعنى البنك هيديلك فلوس او عربيه وفوائد وانت هتسدد ..
تعالى نشوف فى المثال بتاعنا ده ان البنك بيمولنى لحد 10 مليون – وبيقسط لمدة 24 شهر – وبياخد فوائد 7 % سنويا - و دفعة مقدمة 10 % ..... تعالى ناخد مثال لطيف J
طلبنا تمويل لشراء لودر وماكينه و عربيه ب 2 مليون جنيه ... عندنا هنا حلين ...
الاول ان البنك يجيب الحاجه ويحاسبنى او انه يدينى فلوس وانا اشترى ..
الحالة الاولى : توفير الاصول عن طريق البنك :
طبعا قبل ما اشترى بطلب عروض سعر والاحسن بعمله امر شراء والحاجات دى بوديها البنك والبنك بيشترى الاحتياجات دى حسب مواصفاتى اللى ان اطالبها وبيجيبهالى وبنفتح التسهيل ده وهنا اسمها مرابحه .. اللى هى تمويل شراء اصل ثابت .. وطبعا البنك هياخد منى فوائد .... كده
التمويل ب 2 مليون والفوائد 7% سنوى .. = 2×7%= 140 الف للسنه
يبقى السنتين = 140 ×2 = 280 الف ... غير فى مصاريف بنكية طلعت 2500 جنيه .
انا هدفع دفعه مقدمه من اصل المبلغ ده 10% والبنك هيمول الباقى وده لضمان الجديه من قبل البنك وممكن متلاقيش اى دفعه انا بدفعها .. عموما 2مليون×10% = 200 الف
كده انا هدفع دفعه 200 الف والبنك هيدفع 1.8 مليون والفوائد 280 للسنتين والعمولات 2500 ج.
طيب تعالى هنا بقا مش انا دفعت 10% دفعه .. اه حصل .. طيب ليه البنك حسب العموله على 2 مليون كلها ؟؟؟ هوا كده .. نصب .. بس انت لو تعرف تخلى عقد التسهيلات بتاعك ان البنك بياخد العموله على المبلغ الممول فقط = 1.8 مليون  يبقى لوز العنب .. يعنى كده هتدفع عموله اقل ..
عموما تعالى نشوف القيود دى كده ..
لما البنك يجيبلك الاصول دى وانت تدفع الدفعه و فى فوائد تضاف هنا بقا على قيمه الاصل طبقا لمعيار تكلفة الاقتراض اللى اتكلمنا عليه من شويه فى الاعتماد المستندى ... لانه اصل مؤهل لتحمل التكلفه .
العربيه ب 250 الف و اللودر ب 750 الف و الماكينه ب مليون ... يبقى اوزع الفائده ( 280000+ 2500 مصاريف )  عليهم كلا بحسب قيمته ... كالتالى :
·         نصيب العربيه من الفائده ( تحمل عليها ) =  282500×250÷2مليون = 35312 ج ...
·         اذن قيمه العربيه = 250 + 35312 = 285312 ج ...
·         نصيب اللودر من الفائده ( ترسمل ) = 282500×750÷2مليون = 105938 ج ...
·         يبقى قيمة اللودر = 750000+105937 = 855938 ج
·         والماكينه نفس القصه = 282500×1 ÷2مليون = 141250 ج ...
·         يبقى قيمة الاله = اصل سعرها + تكلفى الاقتراض = 1مليون+141250 = 1141250 ج
اجمالى القيم بعد الفوائد = 285312+855938+1141250 = 2282500
انا جبت الاصول بقيمه كام ؟؟ القيمه الشرائية + الفوائد والمصاريف كلها ... هى هى ...
= 2 مليون + 280 الف + 2500 ج = 2282500ج ( عربيه - و لودر  واله )
طبعا لو حد سالنى بعمل كده ليه ؟؟ هقولو لان ده المعيار بيقولى تحمل التكلفه على الاصل . بس
المهم تعلى نشوف القيود دى لما البنك يجيبلى العربيات وخلى بالك انا هحمل الفوائد على الاصول وليس على م عموميه او فوائد تمويل بينما هحملها على الاصول مباشره .
2282500 من ح / الاصول الثابته
285312 – وسائل نقل – او سيارات ( على حسب مسماها فى الدليل عندك ) رقم ..,,،،
855938 – الات ثقيله ( او ايا كان المسمى ) – لدور .,,,،،،
1141250 – الات ومعدات - معده ,,’ـ‘÷
الى مذكورين
200000 ح / البنك – دفعه مقدمه اللى انا دفعتها للاصول .
2082500 ح / تسهيلات بنكيه – تمويل شراء اصول .... او مرابحه رقم ..,،ـ،،،
الارقام دى جات ازاى ؟؟؟
طبعا المبلغ كامل ب 2282500 اللى هو قيمه العربيات والفوائد بتاعته ..
200 الف دى الدفعه اللى انا هدفعها للحصول على الالات – زى دفعه مقدمه كده .
طيب كده البنك هيدفع 1.8 مليون و هيحملنى 280 الف فوائد + 2500 مصاريف =2082500 ج .
بس كده J تعالى بقا نسدد اول قسط للبنك واللى هما هيكون على 24 قسط ؟
يبقى الاقساط لو متساويه =2082500÷24 =86770 ج لكل قسط .
خلى بالك فى بنوك بتتغل بطرق مختلفه ومنهم شغال على جدول الفوائد وكل شيخ ليه طريقه .
انت المهم تفهم المبداء ازاى بس .. تمام يا برنس ؟؟ تعالى نسد اول قسط =
86770 من ح / تسهيلات بنكيه – تمويل شراء اصول – مرابحه .//،/،
86770 الى ح / البنك .               سهله اهو .. محدش ليه حجه بقا J
................................................
الحالة التانيه : البنك بيديلك الفلوس وانت تتصرف
ولا بيفرق معانا الكلام ده يا برنس ... تعالى اقولك J
انا اخدت الفلوس ونزلت فى حسابى البنكى . والى هى هتكون مبلغ 1.8 مليون
من مذكورين
1.8 من ح / البنك
282500 ح / م عموميه  - فوائد تمويل ... مرابحه ....( هخليها عموميه دلوقتى لحد ما اشترى بس )
2082500 الى ح /  تسهيلات ائتمانيه -  تمويل شراء .... رقم ... بطيخ او عنب ... ولو موز شغال J
طيب دلوقتى هو البنك نزلى 90% من قيمة التمويل ... وان اهكمل 10 % اللى ه 200الف واشترى
كده الاصول ب 2 مليون صح ؟؟؟؟
اقولك لا موش صح .. هى ب 2 مليون + تكلفه الاقتراض لان التسهيلات دى انا واخدها لغرض محدد بعينه الا وهو شراء الاصول دى يبقى قيمة الاصول – 2282500 ج .. بنفس طريقه الحساب السابقه .
القيد هعمله كده بالظبط وهحمل على الاصول تكلفة الاقتراض بتاعتى كمان اللى كنت محملها م عموميه :
2282500 من ح / الاصول الثابته
285312 – وسائل نقل – او سيارات ( على حسب مسماها فى الدليل عندك ) رقم ..,,،،
855938 – الات ثقيله ( او ايا كان المسمى ) – لدور .,,,،،،
1141250 – الات ومعدات - معده ,,’ـ‘÷
الى مذكورين
282500 ح / م عموميه ( قفلتها فى الاصل علشان احمل الاصل بتكلفه الاقتراض ) صح 100% .
2000000 ح / البنك – انا طلعت شيك من عندى ب 2 مليون فعلا لشراء الاصول

الارقام دى جات ازاى؟؟؟ اقولك انا
 قيمة الاصول بنفس الحسبة اللى فى الطريقه الاولى .
اما البنك ف حط فى حسابى 1.8 مليون وانا هكمل ب 200 الف واطلع شيك بالاجمالى ب 2 مليون .
اما الفوائد اللى كنت عاملها لما اخدت القرض م عموميه 0 فوائد تمويل ف انا خلاص هجيب بيها الاصول ف هحملها عليها .. اصول J
عارف لومكنتش هشترى بالقرض الاصول واستعملت القرض فى حاجت تانى كنت هخليها اعباءتمويليه زى ما هى وتخصم من قائمه الدخل فى اخر السنه .. بينما انا استعملت القرض لشراء اصوووول
وكله بالاصول J
لما اجى اسد اول قسط عادى جدا زى الطريقه الاولى بالظبط ...... بس كده .
طيب لو البنك بقا نزلى الفلوس ناقصه العموله ؟؟ يعنى بدل ما ينزلى 1.8 مليون راح خصم العموله  اللى هى 282500 ونزلى الباقى اللى هو 1517500 .. اعمل ايه ؟؟
عادى جدااا بس دى غالبا مش هتحصل بس لو حصلت فى اسواء الظروف هتعمل قيد بدل 1.8 اللى فى البنك هتخليهم 1,517,500 ج عادى جدا وتكمل الباقى على 2 مليون علشان تشترى العربيه بس كده البك بيشتغلك لانه نزلك تمويل اقل والحاله دى اللى بيخصم فيها العموله غالبا فى التمويل النقدى بس ..
نكرر تانى كده البنك بيشتغلك ولازم توقف القصه دى وتقول انا عاوز تمويل 2 مليون وانت هتاخد فائده على التمويل ده .. مش كفايه انى هدفع 200 الف . لا كمان هتخصم منى الفائده قبل اى حاجه ؟؟ ان اكده مش هكمل فلوس الاصول ..
المهم خلى بالك من شغل البنك ولو عاوز حاجه احنا تحت امرك
وتعالى ندخل فى حته تانى كده ونشوف هنقول ايه J

ركزز ز ز وصحصح وخليك معايا يا برونزززززز


تمويل شراء اراضى ومبانى
 




تمويل شراء الاراضى والمبانى فى عقد التسهيلات ... مالة ؟؟ ولا اى حاجه خالص
زيه زى اى حاجه تانى .. وبالاخص شراء الاصول طويله الاجل لانه من ضمنها
بس ممكن تلاقية منفصل لوحده كده ..
فى الحته دى غالبا البنك بيخليك ترهن الارض او العقار لحد ما تخلص اقساطه ....
ناخد مثال صغير فى نفس عقد التسهيلات الائتامنية بتاعنا ....
تمويل شراء اراضى ومبانى : قيمة 10 مليون – دفعه 10 % - عموله 7.5% - مده 36 شهر .
حبينا نشترى مبنى ادارى جديد .... ب 15 مليون جنيه .... رحنا البنك قالنا وماله بس ان اهغطيك ب 10 مليون بس .. يعنى هديلك 9 مليون لانك هتدفع دفعه مقدمه ( ضمان جديه ) 10 % ... طيب
انا كده هاخد من البنك 9 مليون وهدفع فوائد على اساس التمويل 10 مليون .. اول اشتغاله بتلاقيها
كمان انا هكمل باقى المبلغ 6 مليون علشان اشترى الارض
طيب تعالى نمشى ورا المثال ده واحده واحده كده ونشوف الخطوات ..
اولا الفائده عندى 7.5% سنوى .. وانا هاخد التسهيل على 3 سنوات
يبقى المبلغ عندى 10,000,000×7.5% = 750,000 جنيه
المده عندى 3 سنوات = 750,000 × 3 = 2,250,000 جنيه
يبقى القيمه دى هتزيد على قيمه الاصل .. يعنى هحمل الاصل تكلفة فائده الاقتراض دى . لان عندى معيار اسمه تكلفة الاقتراض بيتداخل مع الاصول الثابته فى الحته دى ..
الاصول عندى ب 15 مليون + 2.250 فوائد = 17.250,000 جنيه
البنك ليه عندى 9 مليون + 2,250 الفوائد = 11,250,000 جنيه
المفروض انى هدفع الكلام ده على 36 شهر اقساط متساويه مثلاااااااااااا
11,250,000 ÷ 36 = 312,500 ج/شهر
خلى بااالك انا حسبتها فائده بسيطه واقساط متسوايه بس البنك بيشتغل على الجداااااااول ل ل ل
اول حاجه هناخد التشهيل وينزل فى حسابنا فى البنك 9 مليون ونحس الفائده كمان وهنعتبرها م عموميه لحد ما نشورى الاصل وبعدها نبقى نسويها فى الاصل ...
من مذكورين
9 م   ح / البنك
2.250 الف ح / م عموميه – فوائد ××÷÷÷÷
    11,250    الى ح / التسهيلات البنكية – تمويل شراء ××÷÷÷÷
دلوقتى انا هروح اشترى الاصل ابو 15 مليون .. هدفع من البنك 15 مليون و هقفل ح / م عموميه – فوائد اللى فتحته من شويه ده فى حساب الاصل لانى واخد التسهيل او القرض ده علشان اشترى اصل . والاصل ده ( المبنى ) مهيئ لتحمل تكلفة الاقتراض .
يبقى انا هحسب الاصل عندى ب 17,250,000 جنيه .
17,250,000   من ح / الاصول طويلة الاجل – مبانى ÷÷÷‘‘‘÷×××
                        الى مذكورين
                  15,000,000 ح / البنك
                  2,250,000 ح / م عموميه – فوائد /÷÷÷×××
 بس كده ... تمام يا ريس ؟؟!! طيب لما نيجى بقا نسدد الفلوس او الاقساط للبنك هنعمل ايه ؟؟
عادى جدا كل قسط شهرى ( ممكن يكون ربع سنوى او خلافه  قيد عادى جدا
312500 من ح / تسهيلات بنكيه – تمويل شراء ÷÷‘÷÷
     312500 الى ح / البنك ..
بس كده J سهله ؟؟ جداااااا بس عاوزه منك انك تركز ..
خلى بالك : بقا من حته ظريفه اوى ...
مكان التسهيلات ده فين فى دليل الحسابات ؟؟؟
قالك انا عندى فى تسهيلات بتكون ديون على ...
طالما ديون يبقى دى التزامات .. بس طويله الاجل ولا قصيره الاجل ؟؟
قالك برضو فى عندى حاجات بدفعها خال السنه و فى حاجات بتكون خلال سنتين او تلاته زى تمويل شراء الاصول طويلة الاجل ...
طالما كده يبقى اللى خلال السنه هحطه قصير الاجل و اللى خلال سنتين تلاته يبقى طويل الاجل .
قالك برضو انا فى تسهيلات بفتحها فى 2014 لمده 24 شهر مثلا فى شهر 7 يبقى هتخلص فى شهر 6/2016 .. يبقى كده انا لما اجى اقفل ميزانية 2015 يبقى الالتزام الباقى ده هتنقل من طويلة الاجل الى قصيرة الاجل او انى اخليه فى طويلة الاجل زى ما هو بشرررررررط انى اجدد التسهيلات دى مع البنك والكلام ده طبقا للجاب ( المعايير الامريكيه )  و تقريبا متشابه الى حد كبير مع المعايير الدوليه .
المهم انك تكون فهمت الفكرة العامه وكله زى بعضه بعد كده مع اختافات بسيطه كلا فى موضعه J
النقد الاجنبى
 






يعنى ايه النقد الاجنبى ده ؟؟ يعنى فلوس غير عملة البلد .. بس
طيب وهى دى مستاهله انك تفتح لها بند فى العقد ؟؟
اه مستاهله لانه بيوفرلى الفلوس دى بالعمله اللى ان اعاوزها ( دولار او يورو او استرلينى ) و مش بياخد منى مقابل دلوقتى بل بعدين وممكن على اقساط كمان ...
ااااااه فهمت .. يعنى تقدر تقول كده قرض بس بعمله اجنبيه .. ايون الله ينور عليك .
انا بروح للبنك واقولو انا عاوز مليون دولار .. وسعره مثلا الرسمى 7 جنيه . بيدينى مليون دولار ويحسب على 7 مليون جنيه قرض واسدهم مع الفائده خلال مده ولتكن سنه او اقل او اكتر على حسب اتفاقك مع البنك .....
طيب مفيش اختلاف بينها وبين القروض يعنى ؟؟
تقريبا لا الا من حيث الفائده والمده والكلام ده عادى جداااااا
طيب تعالى ناخد مثال بقا على القصه دى ...
عقد التسهيلات بتاعى بيقول : قيمة 5 مليون جنبه – مده 9 شهور – فوائد 3% .
فى 1/7/2014 م  رحت اخد مبلغ  500 الف دولار من عقد التسهيلات بتاعى ... عادى جدا هيدينى وياخد منى فوائد 3% واسدد على 9 شهور اقساط شهريه متساويه ..
اولا الفاوئد بتاعتى هنا هتدخل فوائد اقتراض – م عمومية واداريه .
تانى حاجه التسهيل ده هيدخل تحت بند الالتزامات قصيره الاجل فى دليل الحسابات لانه 9 شهور
ثالث حاجه انا باخد الفلوس بالدولار وهو بيحاسبنى عليها بالجنيه .
رابعا ممكن اسدد على 3 اقساط ربع سنويه ( كل 3 شهور ) او كل شهر وهنفترض انه كل شهر للتسهيل
تعالى نشوف ايه ممكن يتعمل فى الحاله دى ؟
خلى بالك انك هتاخد الفلوس بالدولار ... يعنى هتاخد 500الف دولار .. وفرضا هحطهم فى حسابى فى البنك اللى انا فاتحه بالدولار .. اكيد انا فاتح واحد او اتنين او اكتر عمله محليه وواحده دولار
سعرهم بالمصرى ( الدولار = 7 جنيه ) = 500×7= 3.5 مليون جنيه .
يبقى البنك ليه عندك 3.5 مليون السعر زاد ولا نقص بقا ملناش فيه ..
500 من ح / بنك مصر – دولار
500 الى ح / تسهيلات بنكيه  - قطع اجنبى
طيب هنا القيد بالدولار بس انا هدفع بالمصرى ,,, اعمل ايه ؟؟؟
لو شغال برامج انت هيبقى فى سعر صرف او وبيدخل عندك دائنيه بالجنيه ولما تيجى تسدد هيبقى بالجنيه ولا تشغل بالك .. يعنى هتقولو 500 دولار وفى خانه سعر اعلمله هتقولى 7 وهو بيحول وهينزل عليك دائنيه ب 3.5 مليون جنيه .
طيب تعالى كده نحسب الحسبه دى والبنك هياخد منى عمولات وفوائد وبتاع ..
3.5 ×3% = 105.000 جنيه
يعنى انا هسدد المبلغ ده ... طيب تعالى نعمله قيد كده
105 من ح / م عموميه – فوائد وبتاع
105 الى ح / تسهيلات بنكيه – قطع اجنبى
هتقولى معملتهم فى قيد واحد ليه ؟؟ هقولك عادى بفهمك بس وده ممكن وده ممكن وانت حر ..
القسط بقا = 3,500,000 + 105.000 = 3.605,000 ÷ 9 = 400.555 ج تقريبا
طيب هنسدد اول قسط كده
400555 من ح / تسهيلات بنكيه – عمله اجنبيه او قطع ...
400555 الى ح / البنك – بالعمله المحليه .
طيب خلى بالك انى قلت على الفائده كلها انها مصروف .. بس اللى بخص السنادى 6 اقساط و 3 اقساط السنه الجايه فى 2015 .. يبقى المفروض انى اعمل قيد تسويه فى 31/12/2014 م  بالفرق:
ما يخص 2014 = 105000 ×6/9 = 70000
ما يخص 2015 = 105000×3/9= 35000 ج
يبقى الفرق اللى هقفله هو 35 الف
من ح / م مقدم – فوائد
35 الى ح / م عموميه فوائد
واجى فى 1/1/2015 وافتحه تانى مصروف بعكس القيد
35 من ح / م عموميه – فوائد
35 الى ح / م مقدم فوائد ..
طيب خلصت كده ؟؟ تقريبا ..,,,, الحكايه سهله جدا اصلا ...
بفرض انى مصرتفش المبلغ ده وفضل فى البنك .. وجيت اخر السنه فى 31/12/2014 م لاقيت ان سعر الصرف بقى 6.9 ج .. يعنى قل عما كنت شاريه او بقى 7.1 يعنى زاد .. اعمل ايه ؟؟
عادى جدااا ولا تشغل بالك
فروق العمله
بص يا نجم النجوم فى العالم الخارجى ... عندنا حاجه اسمها مخصص .. وده بيكون لكل الاصول المتداوله وتعالى نتكلم بالاخص فى الحته دى بتاع فروق العمله .. وبعدها انت لو فهمت هتعممه على اى حاجه ... المخصص ده فكرته انى بعمل حساب وسيط وبحط فيه فرق العمله ..
عندى لو الدولار بقى ب 6.9 يعنى انا خسرت 10 قروش فى الدولار .. ان اكان سعره عندى ب 3.5 م
اصبح = 500×6.9 = 3.450.000 يعنى خسرت 50 الف ..
زمان كان فى حساب اسمه ارباح وخسائر بس دلوقتى بخ .. اختفى وطار وفار وغار ..
بقيت بعمل حاجه اسمها مخصص و اقول كده بالظبط
50 من ح / مصروف فروق عمله
  50 الى ح / فروق عمله .. ( مخصص )
خلى بالك ان 50 الاول هتروح تتخصم من قائمه الدخل على انها خساره
خلى بالك ان ال 50 الف التانيه هتروح تتخصم من رصيد الدولار اللى ان اسجلته فى الاول 3.5 م علشان تطلع فى الميزانيه بمبلغ 3.450.000 جنيه ..
حد فهم حاجه ؟؟
تانى المصروف مكانه فى قائمه الدخل لانى خسرت فعلا من فرق العمله دى 50 الف ..
ان امقلتش ان الدولار بقى ب 3.450.000 جنيه لا ان امخليه فى البنك 50 الف دولار وحساباتى بالجنيه هخلبيها زى ما هى واعمل مخصص هبوط للدولار ده ب قيمه 50 الف واخصمها منه علشان يطلع ب 3.450.555 جنيه ...
زمان كنا بنحط المخصص ده فى لميزانيه فى الجانب الدائن .
دلوقتى بنخصمه من ارصده البنك فى الايضاح ونحط القيمه بالصافى فى الميزانيه ب 3.450.000 ج
وليه مش بنحطه بالدولار ؟؟ 500 الف ؟؟ لان الميزانيه عندى بتطلع بعمله واحده بس مش ربع مشكل هو
......... طب لو كان ب 7.1 اعمل ايه ؟؟؟ يبقى انا كسبت المبلغ ده J يعى كسبت 50 الف جنيه
ولو بعت الدولار دلوقتى هيجيب 3.550.000 جنيه .. يبقى لازم يتحط فى الميزانيه بالمبلغ ده J
ازاى بقى ؟؟؟
لو عندى فرق مكسب يبقى ايراد ويروح قائمه الدخل زى ما خصمنا الخساره من قائمه الدخل
طب وايه تانى ؟؟ نعمل نفس المخصص ده بس هنا بقا كسبنا يبقى نضيفه للدولار مش نخصن منه ..
الله يعنى المخصص ده مش حساب دائن ولا حاجه ده مدين اهوت J
يا عم منا قلت لك ده حساب وسيط J هنسميه فروق عمله J
50 من ح / فروق عمله
50 الى ح / ايرادات اخرى – فروق عمله برضو
ال 50 الاولى هتتضاف الى رصيد البنك فى الايضاح ويتحط فى الميزانيه ب 3.550.000
و ال50 التانيه هتضاف ك ربح فى قائمه الدخل على انها ايرادات اخرى ...
الخلاصه :
ح فروق اسعار العمله ده حساب وسيط بقفل فيه فروق العمله الناتجه من تغير سعر الصرف ..
لو خسران يبقى هيطلع دائن والدائن ده هيخصم من رصيد البنك بالعمله بتاعته فى الايضاح ويطلع بالصافى فى الميزانيه ,, والطرف التانى بتاعه المدين يتخصم ك مصروف من قائمه الدخل .
لو كسبان يبقى الطرف المدين ده هو اللى هيبقى ح / فروق العمله ويضاف الى رصيد البنك فى الايضاح ويطلع بالقيمه الجديده فى الميزانيه والطرف الدائن هيبقى ايرادات اخرى ويضاف ك مكسب فى قائمه الدخل ... بس كده وتصبحو على خيررررررررررررررر
القروض طويلة الاجل
 





 يعنى ايه قروض طويله الاجل ؟؟ وايه الفرق بينها وبين القروض قصيرة الاجل ؟؟
القرض ده هو المبلغ المقترض بوجه عام ( دين ) و بيكون غالبا من بنك والفرق بين القرض طويل الاجل وقصير الاجل . ان طويل الاجل بيكون فترة سداده اكتر من سنه اما قصير الاجل بيكون خلال سنه .
يعنى انا اخدت قرضين من البنك وكل واحد فيهم 5 مليون .. بس هسد الاول على 4 سنين = يبقى طويل الاجل ... اما التانى ف هسده خلال 12 شهر = يبقى قصير الاجل ..
مع ان الاتنين بنفس القيمه . بس هى كده بقا .. نعمل ايه ؟
المهم القروض دى برضك التزام على الشركه يعنى مكانها فى الالتزامات
القروض طويله الاجل – التزامات طويله الاجل
القروض قصيرة الاجل – التزامات متداوله او قصيرة الاجل .
...................... تعالى ناخد مثال وكفايه كلام ...............ز
اخدت الشركه قرض من بنك البطيخ الدولى 5 مليون جنيه ضمن اتفاقيه عقد تسهيلات ...
قيمة القرض  5 مليون – مده السداد 24 شهر – الفائده 8 %  .,,, اقساط شهريه
اول حاجه فائده القرض ده وهنفترض انها فائده بسيطه يعنى مش جداول ..
فائده سنويه = 5 × 8% = 400 الف يعنى للسنتين  = 400×2 = 800 الف .
يبقى انا على التزام طويل الاجل = 5.800,000 جنيه .
تعالى نثبت القرض ده لما نزل فى حساب البنك عندى
من مذكورين
5000000 ح / البنك
800000 ح / م عموميه – فوائد
5800000 الى ح / تسهيلات – قروض طويله الاجل ..,,,,,///:::××÷÷
تمام كده .. اخدنا القررض وكله تمام .. بس ليه بقا قلنا الفوائد ح / م عموميه واداريه ؟؟ ليه مش قلنا هنا معيار تكلفة الاقتارض وصدعتنا بيه زى ما كل شويه تقول ..؟؟!!!
لان يا برنس المعيار واضح وصريح وقالك يكون فى اصل مهيأ لتحمل تكلفة الاقتراض
بينما القرض اللى انت واخده علشان تمشى بيه شغلك و تسدد رواتب و موردين وحاجات سيوله يعنى على العموم كده يبقى مش هتحمل تكلفه لا حد فيها ..
تعالى نشوف القرض ده هنسدده ازاى ؟
هسدد المبلغ ده على 24 شهر = 5.800.000 ÷ 24 = 241.666 جنيه شهريا
يبقى كل شهر هعمل قيد واقول
241.666 من ح / تسهيلات ائتمانيه
241.666 الى ح / البنك ..
......................................................واحد طلع قالى انت ليه حملت العمله 800 الف كلها على السنه الحاليه مع ان القرض هسدده على سنتين ؟؟؟ يبقى كده يا محترم لازم تحمل اللى يخص السنادى على السنادى والباقى يبقى مصروف مقدم .. صح يا بيه ولا ايه ؟؟
اقولو تمام يا حاج .. احنا اخدنا القرض ده فى 1/7/2012 و هنبداء السداد فى نفس الشهر
يبقى اللى هتسفاد بيه السنادى نظريا 6 شهور و الباقى مرحل للسنوات القادمه ..
800 ×6/24 = 200 الف للسنادى و 600 الف للسنوات القادمه .. وتعالى نعمل قيد تسويه
600 من ح / م مقدم – فوائد قرض ,,،،،
600 الى ح / م عموميه – فوائد
او انك ممكن لما تاخد القرض اصلا تعمل القيد بالتسويه بتاعته كده
من مذكورين
5000 ح / البنك
200 ح / م عموميه – فوائد
600 ح / م مقدم – فوائد ،،،،
5800  الى ح / تسهيلات – قروض طويله ××÷÷
تمام كده ؟؟ حسبت القرض 5 مليون و الفوائد 800 ( 200 السنادى و 600 السنوات الجايه ) والائتمان كله اللى فدعه ( القرض بالفوائد ) 5800 ..... حلو كده ؟؟
الاوراق التجارية
 





يعنى ايه بقا اوراق تجاريه وبتاع ؟؟؟ ايه الكلام ده ؟؟؟ انا اعرف الورق الابيض A4 & A3  اما ايه الورق التجارى دى ؟؟ مش فاهم !!!! طيب مش هنرد على الهزار ده ونقول كلمتين مفيدين ..
الاوراق التجاريه هى الاوراق الماليه التى تستعمل فى المعاملات التجاريه بديل للنقد .
يعنى ايه ؟؟ يعنى من اول الكمبياله و ايصال الامانه و الشيكات و خلافه
هناخد هنا الاهم والاكتر تعامل وهى الشكيات ( اوراق دفع و اوراق قبض )
خلى بالك الايصالات دى ضمان الحق ولا تسجل فى الدفاتر
يعنى مثلا واحد اشترى تليفزيون ب 1000 ج و مضى على نفسه 5 ايصالات كل واحد ب 200 ج
انا المعرض مثلا هسجل من ح العميل الى ح / المبيعات ب الف جنيه .. ولو مش دفع هرفع عليه الايصالات وقصه محاكم وكده .. يعنى نا بسجل 5×200 ولا الهزيان ده ..
خلينا فى شغلتنا .. وتعالى نقوق ايه اوراق القبض والدفع دول ؟؟ دى شيكات بنكيه عاديه
 لما بشترى وبدفع ب شيك اجل(تبقى ورقه دفع – كانى بدفع فلوس بس اجله )
لما ببيع و باخد شيك اجل ( تبقى ورقه قبض – كانى قبضت فلوس بس اجله )
مثلا انا اشتريت من مورد ب 50 الف واديته شيك يستحق بعد 3 شهور .... هعمل قيد بسيط لما اشترى
50 من ح / المخازن         50 الى ح المورد
ولما اسدد بشيك اجل  :   50 من  ح / المورد           50 الى ح / أ د ( اوراق الدفع )
ولو انا بعت لعميل بضاعه ب 50 الف هثبت واقول
50 من / العملاء       50 الى ح / المخزون
ولما خد منه الشيك 50 من ح / اوراق القبص         50 الى ح / العميل
واحد قالى ليه منزلتش الكلام ده فى كشف حاسب البنك علطول ؟؟
هقولو لان الشيك ده هيتصرف بعد 3 شهور .. ولما اجى اعمل مذكره تسويه البنك مش هلاقيه . يبقى لازم اشيله علشان البنك يتساوى ..
طيب مكان اوراق الدفع فى الدليل --- التزامات متداوله ( لانها دين على لسه مدفعتوش للمورد )
ومكان اوراق القبض فى الدليل  -- اصول متداوله ( لانى لسه محصلتش الفلوس من العميل )
فكرة اوراق القبض واوراق الدفع زى بعض مع العكس لان ده بيدفع وده بيقبض ..
بفرض انى رحت اصرف الشيك بتاع العميل :
من ح / البنك              50 الى ح / أ ق
بفرض ان الشيك لم يصرف لعدم وجود رصيد فى حساب العميل  ,,, برجعه للعميل واخد الفلوس كاش مثلا او انه يدينى شيك تانى او يؤجله لحين تغطيه الرصيد وده بيحصل كتيرررر اوى .. لو اجله كام يوم لحد ما يغطي الرصيد وبيتصل بيا اروح اصرف .. هنا مش هعمل قيد عادى جداااا
بينما لو الشيك اترفض يبقى هرجعه واخد كاش مثلا ...
50 من / الصندوق                 50 الى ح / أ القبض ..
طب قالك فى حاجه اسمها حافظه شيكات ( قبض وصرف ) ودى انا بعملها عندى او انى بحط الشيك فى البنك لحد موعد الاستحقاق والبنك بيحصله و نخلص ..
القصه بسيطه جدااااا بس عاوزه متابعه منك .. كل اسبوع كده تبص وتشوف ايه الشيكات اللى المفروض تتحصل او تدفع وفقا لتاريخ الاستحقاق وتجهز نفسك .. بس كده
طيب قالك فى حاجه اسمها شيك متسطر او مفتوح او للمستفيد الاول بس او او ..
قالك الشيك ده لو مكتوب باسمى انا ... ممكن اديهولك وتسطره – يعنى تكتب اسمك خلف الشيك وتروح تصرفه انت . عادى جدااااااااا وكده يبقى شيك مفتوح ..
طب لو قفله .؟؟؟!! يبقى يصرف للمستفيد الاول فقط
واحد تانى قالك يسطره علشان يصرف فى تاريخ الاستحقاق فقط .. طب هو او انا فى تاريخ 1/5/2014 واديتك شيك فى تاريخ 20/6/2014 .. انت مش هتعرف تصرفه قبل التاريخ ده خالص
واحد تانى قالك مهو بيسطر علشان يتصرف فى اليوم المحدد بس ولا يصرف بعده حتى لو يوم 21/6
اقولو شكراااا روح اتعشى وناااااام J
الدنيا سهله وبسيطه ومش لازم تعقد نفسك بكلام مجعلص .. المهم تفهم وبس . وهتلاقى نفسك بتعرف تدور الدنيا زى الفل ويتستلم الدفع وتوجه السفينه فى الحته اللى انت شايفها كويس لانك فاهم ..
سيبها لله يا حاج وهى هتمشى J
تعالى نشوف بقا ايه مذكره تسويه البك دى J
التسوية البنكية
 





يعنى ايه بقا مذكرة تسوية البنك ؟؟؟ مش فاهمك انا على فكره L
قالك انا فاتح عندى لكل بنك حساب وكل يوم بعمل قيود فلوس دخلت وفلوس خرجت وشيكات ومصروفات وحاجات عندى فى الدفاتر للبنك فى حسابه ...
يعنى معنى كده ان فى حاجه اسمها رصيد البنك الدفترى = اللى عندى فى الدفتر ..
البنك برضو بيعمل كل يوم معاملات وحاجات و فاتح لكل عميل عنده حساب وبيسجل فيها كل العمليات اللى تخصه من شيكات طالعه وداخله و ايداع وسحب نقدى وتسهيلات ومصروفات وفوائد وبلابلابلا .
اخر كل شهر بطبع حساب البنك من عندى و بطبع او اطلب كشف حساب البنك واقارن بينهم ..
واشوف اى معاملات انا نسيت اسجلها او سجلتها بالغلط او مكنتش اعرفها او او او او .. المهم فى الاخر الرصيد الدفترى لازم يساوى = رصيد البنك .
المثال ده للتوضيح والفهم .. انت بتجيب كشف حساب البنك وتبطع كشف حسابك وتحط الاتنين جنبك بعض .. اللى موجود عندى وعند البنك يبقى اشطى ...
·         طب لو فى شيك انا اديته للمورد والمفروض انه صرفه وانا خاصمه من عندى بس مش لاقيه فى حساب البنك ؟؟؟ معنى كده ان المورد مصرفش الشيك ... يبقى لازم اشيله من حساب البنك ... واعمل قيد ارده الى اوراق دفع ..
·         طب لو انا بعت شيك عميل علشان اصرفه ونسيت اسجله ؟؟ والبنك اضافه الى حسابى ؟؟ يبقى انا لازم اضيفه فى حسابى واعمل قيد .
·         لو البنك خصم منى عمولات وانا مش منزلها عندى ؟؟ يبقى انزلها عندى بقيد علشان اخصمها ..
·         الخلاصه انى لازم اطابق بين الاتنين .. بس خالى بالك
خلى بالك .. البنك بيشتغل فيه بشر برضو وممكن جدا يغلطو وانا شخصيا شفت حاجات نازله فى البنك بالغلط او بالزياده .. كانه مثلا ينزل قسط تسهيلات بنكيه او عمولات اكبر مما يجب وانت حسبتها لاقيت انه منزلها اكتر .. بنراجع البنك وبتتعدل ...
يعنى البنك مش مرجع بنسبه 100% .. خلاص ... انت بتراجع على نفسك من البنك ..
ممكن انت تطلع غلطان وممكن البنك يطلع غلطان برضو
الدينا مفيهاش ضمانات ومفيش حاجه اكيده 100 % .. بس وتعالى نشوف المثال البسيط .,,
مثال عند طلب كشف ح من البنك وجدنا ان رصيده 481330ج بينما رصيدنا فى الدفاتر كان475000ج  
وعند المراجعه والمطابقه اتضح الاتى :
1.    ارسلنا شيك للتحصيل 19500 ونزلناه فى دفاترنا ولم يحصله البنك ولم يحطه فى حسابنا .
2.    اصدرنا شيك للمورد ب 20000 ج ونزلناه فى دفاترنا ولم يصرف ولم ينزل فى حسابت البنك .
3.    احتساب البنك عمولات 120 جنيه وفوائد 450 ج لم نثبتها عندنا لعدم المعلوميه بوقتها .
4.    البنك نزل فى حسبنا 3000 ج فوائد للوديعه اللى احنا حطناها فى البنك .
5.    البنك نزل ف حسابنا 4600 ج ارباح من الاسهم بتاع المحفظه بتاعتنا .
6.    البنك خصم 1200 ج قسط السياره واحنا مكناش نعرف .
كفايه كده وتعالى نشوف هنعملها ازاى ... اولا نحط رصيد الدفتر بتاعنا ونجمع ونطرح الحاجات اللى عندنا واللى مش عندنا لحد ما نصل الى رصيد البنك ولازم يطلعو متطابقين ؛

مبلغ
بيان
تاريخ
ملاحظات
475000
رصيد الدفتر
31/6
رصيد الدفتر بتعنا
19500
- شيك لم يحصلة البنك من العميل
--
يخصم لان البنك محصلوش
20000
+شيك لم يحصله المورد من البنك
--
يضاف لان المورد مصرفوش
570
- فوائد وعمولات بنكيه
--
يخصم لان البنك خصمها مننا
3000
+فوائد ودائع بنكيه
--
يضاف لانه من حقنا
4600
+ارباح اسهم المحفظه
--
يضاف لانه بتاعنا
1200
- قسط سياره
--
يخصم لاننا دفعنا
481330
رصيد البنك
--
وكده رصيدنا فى الدفتر = رصيد البنك

طبعا المثال ده انا بفهمك بس وانما فى المذكره انت بتكتب بالترتيب
بنود تضاف ...... كذا و كذا وكذا .
بنود تخصم .... كذا وكذا كذا

وكل بنند من دول لازم يكون ليه قيد يثبته J