بحث هذه المدونة الإلكترونية

الأربعاء، 11 نوفمبر، 2015

المصروفات (الاستاذ/ رفيق هاشم)

المصــروفــــات

السلام عليكم ورحمة الله وبركاته .... نبذه مختصره عن المصروفات ..
اهم حاجه فى المذكره دى انك تفهم يعنى ايه مصروف و يعنى ايه تكلفه وحقيقه مش عارف ابداء منين بس تعالى نقسم المصروفات كده :
 خلينى اقول ان المصروف ده مبلغ انا بدفعه علشان يساعدنى فى الشغل ( مصروفات عموميه واداريه ) او يساعدنى فى الانتاج ( لو مصروفات تشغيليه )
مثلا عندى فى الاداره فى ايجار وكهرباء ورواتب و مصاريف بوفيه و تليفونات ومواصلات الخ الخ الخ
كل ده مفيش من وراه مصلحه ولا فلوس داخله ولكنه بيساعد فى العمل ..
ازاى يعنى يا بيه ؟؟
يعنى من غير الايجار مش هنلاقى حته نقعد فيها بس هتلاقى المصنع شغال وبينتج ..
ولو عندى مكتب بس من غير الكهرباء مش هعرف اشتغل برضو ..,,
وانا قاعد شغال محتاج اشرب قهوه و اجيب ورق اطبع عليه وبلابلابلا
يبقى عندى هنا فى مصروف لا يتولد عنه ايراد ولكنه مهم للمساعده فى توليد الايراد ..
تعالى نقول تانى ان فى مصروف بقا بيتولد منه الايراد ..... حد يسالنى ازاى ؟؟
اقولك يا برنس لو انا شغال فى مصنع اثاث مثلا ... وبشترى خشب كتير علشان اصنع اوض نوم وخلافه
هنا بقا الخشب ده مصروف بس تشغيلى وبيساعد او بيتولد عنه ايراد بصوره مباشره فلولا وجود الخشب لا يوجد منتج .. وكذلك العمال مصروف ومباشر ومن غيره مش هيكون فى انتاج ...
الخلاصه :
عندى مصروف عمومى ( لايتولد عنه الايراد ولكنه ضرورى للعمل )
عندى مصروف تشغيلى ( يتولد عنه الايراد ومن غيره لا يوجد عمل 9 .,,
تعالى نقول برضو ان عندى المصروف ده ممكن يتقسم الى مصروف ايرادى ومصروف راس مالى :
المصروف الايرادى هو اللى بيصرف على حاجه خلال السنه الماليه ولا يمتد لسنه اخرى وبيكون مقابل ليه سلعه او خدمه .. زى فاتوره الكهرباء او الخشب اللى صنعت منه اوضة نوم وبعتها السنادى وخلافه .
يعنى حاجه انا بصرفهاللانتاج او لمساعده الانتاج ( مصروف بقا عمومى او تشغيلى )
المصروف ده بطبيعته مدينه .. وكل ما اصرف حاجه هقول من ح / المصروف
مثلا ايجار او رواتب ( عموميه واداريه ) او اسمنت وحديد ( مصروفات تشغيليه )
من مذكورين
 ح / م عموميه
-         ايجار
-         رواتب
ح / م عمليات ( تشغليه ) مشروع ××
-         حديد
-         اسمنت
الى ح / البنك او الصندوق او المورد ,,,, وخلافه
شفت فى كل الحالات عند الانشاء او الاثبات بيكون مدين --- بس برضو ممكن يطلع دائن ...
ازاى ..,, لما اخفضه او اعكسه وتعالى نشوف مثال ..
ان ادفعت ايجار لمده 6 شهور وقلت ب 60 الف  فى شهر 10/2015
60 من ح / م عموميه - الايجار
   60 الى ح / البنك
واخر السنه اكتشفت ان فى 3 شهور تخص السنه الجايه يبقى هقلل المصروف ده و اعمله دائن
30 من ح / م مقدم – ايجار
30 الى  ح / م عموميه – الايجار
شفت يا حاج .. ادى المصروف اللى طبيعته مدينه اتقلب وبقى دائن ...
ومثلا الراجل اللى اخد المرتب من شويه ده اكتشفنا انه كان واخد الاوفر تايم ومتسجل لوحده بقيمه 500 جنيه .. وكان متسجل فى قيد لوحده .. يبقى نخفضه وناخد ال 500 منه نعكس القيد ب 500 جنيه
500 من ح / الصندوق
  500  الى ح / م عموميه – رواتب واجور
نفس القصه دى تنطبق على المصروفات التشغيليه – الى هى مصروفات العمليات .. لما نحب نخفض مصروفات العمليات لانى رجعت شويه اسمنت للمود ب 5 الاف نعكس القيد
5 من  ح /المورد
5 الى ح / م العمليات – مشروع ××
-         اسمنت
او مثلا حولت شويه حديد من موقع الى موقع يبقى اخفض من اللى نقص و اعلى على اللى زاد بنفس القيمه كالاتى :
من ح / م عمليات مشروع أأأأأأأ
-         حديد
الى ح / م عمليات مشروع ××× ( ده اللى نقص )
-         حديد
شفت بقا اهو برضو المصروف الى طبيعته مدين اتقلب وبقى دائن ...
تقدر تطبق القصه دى على حاجات كتيرررر بس المبداء واحد ..
عندى كمان مصروف عمومى يتقلب ويبقى م عمليات .. ازاى ؟؟
عندى كراسه شروط اشتريتها لمشروع ب 50 الف وهقول
50 من ح / م عموميه
50 الى ح البنك
شاءت الظروف والمشروع ده رسى علينا ...
هنقلب المصروف العمومى ( نقفله ) ونحمله على م المشروع كده
50 من ح / م عمليات – مشروع الفس س س س
50 الى ح / م عموميه – كراسه شروط
ونفس الكلام بالنسبه لمصروفات خطاب الشمان الابتدائى وخلافه ,,,
المصروفات طبيعتها مدينه طول ما هى بتزيد . وتقلب عكس الطبيعه وتكون دائنه اذا نقصت او خفضت

اما المصروف الراسمالى ف ده مصروف انا برسمله .. يعنى ايه ؟؟
يعنى مصروف انا صرفته النهارده بس اثره يمتد لعدة سنوات قادمه ... هوبااااااااا
المثال الشهير اوى عمره الات او سياره بس ليه شروط لازم تتحقق علشان اقدر اعتبره مصروف راسمالى ولو لم تتوافر الشروط يبقى مصروف ايرادى ....
طب ايه هى الشروط ؟؟ قالك يا حاج لازم اولا يمتد لعده سنوات ... طب ليه ؟؟ وازاى ؟؟
ليهده -  لانه بيصرف مثلا على الات ويؤدى الى اطاله عمرها الانتاجى او تحسين الانتاج
مثلا عندى اله خلاص قربت تبقى خرده وبتنتج 100 وحده فى اليوم ... تمن الاله دى 100 الف
انا بقا صرفت عليها 40 الف مما ادى الى زياده الانتاجيه وبقت 180 وحده فى اليوم
او ان كان المفروض تتخرد بعد 4 شهور و بعد ما ظبطها بقت هتستمر لمده 3 سنين قادمه
او ان المنتج بعد ما كانت جودته 40% وانا عملت تحسينات على الاله بقى جودته 80% مثلا
القيمه 40 الف دى مش مصروف لانه اطال عمره الاصل الى عندى او حسن انتاجيته او جودته وخلافه
لما نيجى نثبت المصروف ده هنقول عليه مصروفا راس مالى وبيدخل ضمن تكلفه الاصل ..
40 من ح / الاصول
-         الات ومعدات ( الاصل رقم ××÷÷×× )
40 الى ح / البنك او ,,,,,
ودى يا برنس بتظهر عندنا فى ايضاح الاصول اخر السنه فى حته كده اسمها اضافات .
يعنى قيمه الاصل الدفتريه ب 100 الف و عملنا اضافات ( تحسينات ) ب 40 الف يبقى قيمته الجديده ب 140 الف  - و الجدير بالذكر ان ال 40 دى بتهلك زيها زى االاصل تماما عادى .....
حد فهم حاجه ؟؟ يبقى عندى مصروف راسمالى ومش بيخصم من قائمه الدخل زى المصروف الايرادى وانما بيدخل فى الميزانيه مع الاصول الثابته ...,,,,,, تعالى نكمل ..
تعالة نقول ونزيد ونقول يعنى ايه نفقه ؟؟؟
قالك النفقه دى زى المصروف – وجهان لعمله واحده ..
بمعنى انى عندى نفقه ايراديه زى اللى قلنا عليها مثلا صيانه اله وبنزين ومصروف رواتب عمال الانتاج وحاجات كده كتيرررررر
ونفق ايراديه مؤجله .. كانى مثلا عملت حاجه تمتد للعام الحالى وجزء منها للعام المقبل زى بوليصه تامين المصنع ضد الحريق وانا دفعتها فى شهر 6 السنادى وتنتهى السنه الجايه ..
يبقى نصها ايردا ىونصها مؤجل ..
طب ايه التكلفه  ؟؟؟
التكلفه دى يا محترم هى التضحيه بمبلغ محدد من المال لاجل الحصول على خدمه او سلعه
يعنى التكلفه دى يمكن تكون م شحن بضاعه او م تسويق او اشتريت عربيه جديده J
طب والخساره ؟؟ الخساره دى مبلغ من المال صرف دون الحصول على مقابل
يعنى خسرت شويه فلوس .
زى ما اكون واخد شغلانه اشطب حمام بيت زبون و جبت مرايه للحمام ... وهووووب اتكسرت هى والقاعده قبل ما اركبهم ..او اتسرقو .. او اتحرقو او اتشنقو ..,,
يبقى دى خساره صريحه J
وعندنا خسائر راسماليه .. ودى لو بعت اصل باقل من قيمته ومجمع اهلاكه .. مثلا :
الاصل اشترتيه ب 100 الف و اهلكته لمده سنتين ب 50 الف . يبقى الصافى 50 الف .
بس بيعته ب 30 الف وكده اكون خسرت ( خسائر راسماليه ) 20 الف... تمام يا اخويا ؟؟
...................................................................................................................
-  المصروفات : وهى الاعباء التى تتكبدها المنشاه فى سبيل تحقيق الايراد وتقسم الى :
1.    مصروفات عموميه واداريه : وهذا اللفظ موجود فى كل المنشات مهما اختلف النشاط وهى مثل ,, الرواتب الايجار والصيانه والضيافه والادوات المكتبيه وم نقل والكهرباء والمياه والهاتف ,,,,,, .
2.    مصروفات التسويق: ودى لا توجد فى كل الشركات فلا توجد فى شركات مقاولات الانشاءات لان حجمها لا يكون كبير وطبقا للاهميه النسبيه احنا بنفتح حساب للحاجات المهمه اوى وبتكرر ومبالغها كبيره بينما نجدها فى شركات الاغذيه لان عندها مندوبين تسويق وبيع وسيارات كتير وما الى ذلك .
3.    مصروفات التشغيل: ودى مصاريف الانتاج – يعنى فى المصانع هتلاقى م تشيغل وبسجل فيه كل اللى بصرفه حتى اتمام الانتاج – او مصاريف العمليات – هتلاقيها فى المقاولات – و المصاريف دى بتكون كبيره و كتيره ومتكرره و بيكون ليها الاهميه القصوى فى المتابعه والتحكم وده هنشوفو فى كتب التكاليف و المقاولات للعبد الفقير ...  .
4.    م التمويليه :  ودى بتختص بالتمويل والقروض وفوائدها وما الى ذلك وتلاقيها لو انت بتاخد قروض من البنك او بتجيب حاجات بالتقسيط وعاوز تعرف بتدفع اد ايه طول السنه ,,,,
5.    مصروفات اخرى : وهى مصروفات لا تتكرر بصوره مستمره وقليله المقدار والتكرر مثل تاجير صاله فى ارض المعارض ودى مره كل 4 او 5 سنين او,,,, .
J والجدير بالذكر ان المحاسب هوا اللى بيحط اسماء المصروفات دى وبيحدد طبيعتها وفقا لما يتناسب مع طبيعه الشغل واهميه هذه المصروفات وهو المبتكر فى الاسلوب ولا يجب ان يقف فهمه او ادراكه على حد معين بل يجب عليه البحث ولا يضع اى حساب لا يعلمه فى ح / م . اخرى لانه وقتها سيكون قاصر الفكر قليل الفهم بل يجب ان يبحث الى ان يجد اسم الحساب المناسب للعنصر الذى يبحث عنه .
J كما انه لابد من التنويه ان هناك نوعين من المصروفات هما ؛
1.    المصروف الايرادى : وهو المصروف المتعلق بالايراد اى الذى ينتج عن صرفه تحقق ايراد من نشاط المنشاه العادى مثل مصروف الصيانه للالات فهو مرتبط ارتباط وثيق بالانتاج لاننا لو لم نشحم ونصين الاله لما انتجت اصلا واصبحت باله عديمه الفائده وكذلك الهاتف او الكهرباء او المواصلات او ,,,,,,, عده بنود بلمعظمها تعتبر مصروف ايرادى وده بيقفل مع حسابات اخر السنه .
2.    المصروف الراسمالى : وهو مصروف يتسم بطابع خاص وغير متكرر وكبير القيمه مثل احداث تغيير فى ماكينه يكون من شانه اطاله عمرها الانتاجى وهنا يضاف هذا المصروف على حساب الاصل ويهلك معاها ولا يقفل فى اخر السنه ,, مثلا ماكينه بدلنا جزء فيها ب 5000 ج وتسبب فى زياده الانتاج فليس من العدل ان يكون مصروف ايرادى بل راسمالى ويضاف الى الاصل .

ياريت نكون فهمنا يعنى ايه مصروف بشتى انواعه وكيفيه معالجته المحاسبيه .
واللى عاوز يسال او يستفسرفى اى حاجه انا تحت الامر دائما ....
ياريت كمان نبص على كتاب المحاسبه الماليه علشان نشوف حاجات تانى للمصروفات زى مصروف مقدم او مسروف مستحق او مصروف الاهلاك ومصروف مخصص نهايه خدمه وبلابلابلا
سؤال بقا .. هل المشتريات فى الشركات التجاريه تعتبر مصروف او نفقه او تكلفه او اصول ؟؟ركزززز

بس كده كفايه
وما توفيقى الا بلله


                                                                      رفيق هاشم احمد
إرسال تعليق