بحث هذه المدونة الإلكترونية

الأحد، 14 ديسمبر 2014

المــــبــيــعـات و المـشــتريـــات والخـــصــــومات

   المــــبــيــعـات و المـشــتريـــات والخـــصــــومات   
المبيعات و المشتريات من الحاجات الهامه جدا اللى لازم تفهمها بوضوح .. واعتقد كده انت تقدر تعمل و توجه قيد محاسبى بصوره صحيحه J
× المبيعات دى هى اللى الشركه بتولد منها الربح الرئيسى ليها . وعلشان كده بنقول عليه ايراد المبيعات .
× والمشتريات دى هى المصروف او التكلفه اللى يكلفها علشان انتج منتج او اشترى حاجه وابيعها .
يعنى لو انا مصنع او شركه تجاريه او مطعم او اى حاجه وعندى سلعه ببيعها او خدمه بأديها للغير . وباخد نظير السلعه او الخدمه مقابل مادى .. هقول عليه ايراد المبيعات سواء نقدى او اجل .( حصلته او لسه ) .
و فى نفس الوقت انا علشان انتج السلعه دى لازم اشترى مكونات الانتاج – ولو شركه تجاريه يبقى الاول هشترى السلعه دى وارجع ابيعها واخد الفرق ده ربح ,,..
طبعا المبيعات والمشتريات دول هما الاساس فى اعداد قائمه الدخل للشركات التجاريه
هنشوف هنا لما بشترى او ببيع السلعه دى و ادى عليها خصم كميه او خصم تجارى هعمل ايه ؟
كمان لو فى ضريبه مبيعات هسجلها ازاى ؟؟ ولو اتخصم منى خصم واضافه هسجلها ازاى ؟؟
بس الاول تعالى نتعرف على انواع الخصومات :
·       الخصم النقدى : هو الخصم اللى بينزل فى الفاتوره .. يعنى مثلا انت اخدت فاتوره ب 1220 جنيه والراجل عملك خصم نقدى 20 جنيه على الفاتوره ويبقى الصافى 1200 جنيه .. وده اللى بيتعمل بيه القيد . يعنى لايسجل فى الدفاتر .
·       خصم الكميه : الخصم ده بيكون غالبا فى تجار الجمله وبيكون على ظريقه الشرائح . بمعنى لو انت اشتريت 100 قطعه بيكون سعر القطعه 5 جنيه – ولو اشتريت حتى 500 بيكون السعر 4.5 جنيه – ولو اشتريت حتى 1000 قطعه بيكون السعر 4 جنيه .. يعنى خصم على الكميه .. كلما اشتريت اكتر تاخد خصم اكتر . وده برضو بيتسجل بالصافى ولا ينزل فى الدفاتر . بينزل فى القيد ببصافى القيمه بعد الخصم ..
·       الخصم التجارى : الخصم ده بقا حاجه مختلفه و عاوزه تركيز لانك بتنزل القيمه قبل الخصم ولو حصلت على الخصم بعد العمليه بتنزل الخصم سواء فى البيع او الشراء . وبيكون مرتبط ب فتره – يعنى تقدر تقول عليه خصم تعجيل الدفع – بمعنى انك هتشترى مثلا ب 1000 جنيه , هتسجل العمليه فى القيد بنفس المبلغ . و لو سددت خلال اسبوع هتاخد خصم 5% من القيمه مثلا . يعنى لو سددت هتعمل قيد بالخصم ده ولا تنقص فى القيد الاول يا حاج ...
هنقول تانى : انا بسجل فى الخطوه الاولى باجمالى الفاتوره قبل الخصم لان الاسبوع لسه مش عدى .. ولو دفعت خلال الاسبوع هاخد خصم 50 ج وادفع 950 ج – ولو سددت بعد الاسبوع هسدد الاف كلها ومش هاخد الخصم ....
عند البائع اسمه خصم مسموح به – عند المشترى اسمه خصم مكتسب
المهم تعالى ناخد مثال كده فى الحكايه دى J  
فى 1/5/2009 تم بيع بضاعه لاحمد بمبلغ 50 الف – بخصم نقدى 5% - 10 ايام & ضريبه مبيعات 10% وخصم واضافه 5. % . وتم تحصيل المبلغ فى 8/5/009 م .
تعالى نشوف ازاى نسجل القيد ده ..
1.    هنسجل الفاتوره بالمبلغ الاجمالى 50 الف لاننا لسه محصلناش ولا نعرف سكه الخصم ايه ؟؟
2.    الضريبه 10% هتسجل لوحدها 5000 ج وتعلى على العميل للتحصيل ثم تسدد لمصلحه الضرايب .
3.    ضريبه الخصم والاضافه 5.% من الفاتوره = 250 ج ودى بقا المشترى هيخصمها و يسددها لصالحنا فى الضرايب ويجيب لنا نموذج 41 يفيد ب كده علشان منتحاسبش عليها مرتين .
4.    الخصم بقا عند التحصيل فى التاريخ هيكون 5% يعنى = 2500 ج ...
تعالى نعمل القيد الاول بتاع البيع وهنكتب فيه العمليه فقط .
55000 من ح /العملاء - احمد ( 50 الف بضاعه + 5 الاف ضريبه مبيعات )
الى مذكورين
50000 ح / ايراد المبيعات ( قيمه البضاعه المباعه )
5000 ح / ملصحه الضرائب على المبيعات ( 10% من البضاعه )
تانى حاجه فى السداد هعمل ايه ؟؟؟ الراجل سدد فى التاريخ يبقى ياخد الخصم .
من مذكورين
250 ح / مصلحه الضرائب – خصم واضافه ( المبلغ اللى الراجل خصمه منا وهيسدده لحسابنا )
2500 ح / خصم مسموح به .
52250 ح / الصندوق ( ده الصافى بقا من 55 الف على العميل بعد خصم نقدى وخصم ضريبه 5. %  الى فوق )
55000 الى ح / العميل ( كده انا قفلت ح العميل فعلا )
خلى بالك انا عليت على مصلحه الضرايب 5الاف على .. وليا 250 من الحساب باع الخصم والاضافه .
تعالى ناخد نفس العمليه بالنسبه للمشترى ..,,
الاول عند الشراء .
من مذكورين
50000 ح / المشتريات ( دى البضاعه فعلا )
5000 ح / ضريبه المبيعات ( لان انا اتعلى على 5 الاف لحساب الضريبه )
55000 الى ح / المورد ( بقيمه البضاعه والضريبه )
لما اجى اسدد فى الموعد علشان اخد الخصم ..
55000 من ح / الموردين
الى مذكورين
52250 ح / الصندوق
2500 ح / خصم مكتسب
250 ح / مصلحه الضرائب – خصم واضافه .
لاحظ : القيد فى حاله الشراء عكس القيد فى حاله البيع تماما .. يعنى اللى دائن عند ده بيكون مدين عند ده والعكس . واسماء الحسابات هى هى مع اختلاف ان الخصم عند البائع اسمع مسموح به وعند المشارى اسمه الخصم المكتسب ...
يعنى الخصم عند البائع عبئ او خساره  - - و عند المشترى ايراد او مكسب .
علشان كده هتلاقيه فى قائمه دخل البائع بيخصم من الايراد و انما فى المشارى بيضاف لانه ايرد اخر ....
طيب لو الراجل ده سدد بس بعد التاريخ = لا ياخد خصم ونسجل القيد كده .
55000 من ح / الموردين
الى مذكورين
54750 ح / الصندوق
250 ح / مصلحه الضرايب – خصم واضافه .
خد تمرين وحله بقا وشوف كده ... قامت شركتنا الحلوه بالعمليات التاليه .
1.    فى 4/5/2008 بيع بضاعه بمبلغ 5000 ج كاش – ض م  10%.
2.    فى 8/5/2008 بيع بضاعه بمبلغ 50000 الى العميل طارق ( ض م 10% و خصم واضافه 5. % و خصم نقدى 4% - 15 يوم ) تم التحصيل فى 15/5/2008 م .
3.    بيع بضاعه بمبلغ 25500 اجل بخصم تجارى 500 جنيه ض م 10% . ( اوعى تقع فى الاشتغاله )
4.    شراء بضاعه من احمد فى 10/5  بمبلغ 20000 ج ( بخصم نقدى 5% - 10 ايام  ض م 10%)

سجل بقا العمليات دى فى يوميات محاسب J ولو وقفت ارجع للمثال اللى فوق ده وانت تعرف تفوت فى الحديد ولو مش عرفت انا موجود تحت الامر
كتب بقلم/    rafy_hash
 
إرسال تعليق